وحش ازرق

ـ1ـ
مين قال لونك، يا بحر، أزرق
وفيك المراكب دوم عم تغرق؟
هـ الناس يللي بلعتُن أمواج
ومتل الغنم ماتوا فواج فواج
دمُّن برقبة مين.. يا أحمق؟!
ـ2ـ
تركوا بلادُن.. خايفين الموتْ
شافوك حلم كبير.. فات الفَوْت
غدرت فيهُن.. غرّقت العيال
وبعدك بتاكل، يا وحش، أطفال
صرخوا: يا ألله.. وضاع فيك الصوت
ـ3ـ
روح غسّل موجك من الدّم
الريحه كريهه.. آخ لو بتشم
فوق ظلم الحرب إنت ظلمت
ما رحمت طفل زغير.. ما تألّمت
بحلف أنا.. بحلف ما عندك أم