كتبت هذه القصيدة لتلقيها تلميذتي باميلا خوري في عرسها
ـ1ـ
رِبَّيْتني عَ الحبّ يا بيّي
وعطيتْنِي مْنِ مْحَبِّتَك مَخْزون
البنت الوحيدِه إِجْتَك هْدِيِّه
وعرفتْ كيف هديّتَك بِتْصون
عَ طولْ شُوفَكْ خايِفْ عْليّي
مجنون كنت بطفِلْتَك مجنون
يا نعمة الربّ السماويّه
طول العمر قلبي إلَكْ مديُون
وإنتي يا إمّي العايشِه فيّي
طبق الأصل عنّك أنا رح كون
إنتي القداسه بصفحة شبيّه
يا ساكنه جوّات عينيّي
من الصعب إنّك تتركي العيونْ
ـ2ـ
مْنِ بقاعكفرا.. من جبل لبنان
زارع بِـ قلبي زهور المحبّه
تسلم يا بيي الطيّب الانسان
تسلم يا أرزة مجد بالغربه
لمّن بصلّي بسأل الديّان
تضلّ شعلة نور بِـ دربي
وإنتي يا امي.. يا قمر نيسان
يا طلبة الما بتسبقا طلبه
البنت الوحيده مزيّنه بإيمان
من قلب طاهر باركو ربّي
إنتي وبيي كنز بالهجران
رح تسكنوا عَ طول بِـ قلبي
ـ3ـ
يا دْجايمس دحدح يا حبيب القلب
ركعنا نصلّي المسبحه سويّه
والمسبحه تفرشلنا هالدرب
أحلام مع وردات جوريّه
يا زغرتاوي.. يا أحلى شبّ
سانت ريتّا راضيه عليي
وإنتو يا أغلى ناس.. رمز الحب
بشكركن من القلب ليل نهار
بإسم إمّي.. وبإسم بيي
