ـ1ـ
من الصعب قلّك، يا قمر، شو صار
دوري انتهى، وساعات عمري قصار
بسنتين يمكن إلبط السبعين
ويصير إسمي: شربل الختيار
ـ2ـ
إحمل عصا، وصلّي تا أللـه يعين
ونهار عم يتكي ع كتف نهار
كنتي بعيوني أجمل الحلوين
من سحرك نجوم السما بتغار
ـ3ـ
وكل ما سنه تمرق وتطوي سنين
تدبل ع إيدي باقة الأزهار
ما رضيت أفضح سر حبّي.. مين
متل الحبيب بيكتم الأسرار؟
ـ4ـ
كنت الجبان الخايف المسكين
رحتي معو.. حسيت جسمي انهار
خسرتك أنا.. خسرت الفرح تخمين
بحكي لحالي.. بجاوب ومحتار
ليش بعدا صورتك بالدار؟
**
