مارسيل خليفة

ألقيتها بحفل تكريم الفنان الكبير مارسيل خليفة في برلمان ولاية نيو ساوث ويلز بدعوة من السناتور شوكت مسلماني بيوم عيد الحب 14 شباط 2019

مَرْسيلُ أنتَ الفنُّ والشعرُ أنا      
خذْ من بيوتِ الشعرِ وابنِ الموطِنا
أنتَ العظيمُ الفذُّ.. أنتَ المُبتدا      
إنْ سِرْتَ سارتْ خلفَ منكَ الأزمنه
فالعودُ لولا عزفُك الحلوُ الشجيْ    
أضحى ديكوراً في زوايا الأمكنه
إعزفْ بِهجرٍ.. رقِّصِ الأوتارَ.. مَنْ     
مثلُ "الخليفَه" قدْ يُداوي جُرْحَنا

كلُّ الأناشيدِ التي غنّيتَها      
عاشتْ بنا.. حتى امتلكنا حلمَنا
لو جارتِ الأيّامُ فنُّكَ ملجأٌ        
لو ضاع منّا الصوتُ تبقى صوتَنا
إنّي أَحنُّ لخبزِ أمي دائماً       
لكنّه الطاغوتُ يسبي قمحَنا
لا، لا تخف، أنشدْ، فأنت المرتجى    
من أمّهاتِ اللحنِ يأتي خبزُنا

أمشي ولكنْ قامتي لمْ تنتصبْ     
فالجسمُ بعد الهجرِ أحناهُ الضنى
لولاكَ ضيَّعنا طريقاً للحمى      
فالدربُ يا "مرسيلُ" محّاها الفنا
إنّا هجرنا الأرضَ مثلَ سفينةٍ      
أنظرْ إلينا قد ملأنا بحرَنا

عمشيتُ يا عمشيتُ كوني نوتةً      
كي تفرحَ النوتاتُ منذُ المِيْجَنا
أهديتِنا إبناً حبيباً رائداً        
غنّى لنبقى.. حتى يبقى أرزُنا
لُبْنانُ.. ما لُبنانُ إلا جنّةٌ        
إنْ نرمِها بالنارِ.. يَغْضَبْ ربُّنا
القدسُ ضاعتْ.. لا تسلْ عن "قُبلةٍ"     
ما من زعيمٍ أرّقتْه قدسُنا
غنّيتَها.. أوّاهُ لو أخفيتَها        
باللحنِ بالأنغام كي تبقى لنا
يا ليتَهم أضنوا عدوّي مرةً      
حتّى أبوسَ الرأسَ من أعرابِنا
لكنّهم بالكذب قد غطّوا المدى    
والكذبُ ملحٌ.. آهِ من أملاحِنا

إفرحْ.. بعيدِ الحب أنتَ مكرّمٌ      
فالحبُّ بالهجرانِ من عاداتِنا
هذا "السِّناتورُ" الأشمُّ الألمعيْ    
في برلمانِ الحقِّ أضحى فخرَنا
شوكتْ يضحّي.. مَن يضحّي مثلَهُ؟    
إبنُ الجنوبِ "المُسْلِماني" إبنُنا

أهديكَ يا "مرسيلُ" دنيا منْ شَذاً     
أدخلْ.. فما أبهاكَ لو تبقى هنا
جئتُم إلينا كي تُزيلوا غربةً       
شكراً لكم.. ها قد سكنتم قلبَنا
**
عيدالحب 14/شباط 2019

ام طوني

الى روح الأم الحبيبة نديمة نادر

يا أم طوني تذكري اللي كان
بـ مجدليا وصحبة الخلاّن
خرستين ستّي بصوتها الهادر 
تصرخ يا أهلا وتفرح الدكّان
عشنا بمحبه.. ما حدا يكابر 
بعيال بتشرّف بني الإنسان
وكنت مع طوني ع البيادر 
نلعب سوا إخوان شو إخوان
نشبع رضا من تمّك الطاهر 
وكل ما قفينا تكتّري الصلبان
كبرنا سوا وصار العمر آخر 
وما فرقّت بيناتنا الأزمان
شربل يا إبني تصرخي.. الظاهر 
عندك عطف بيزيّن الأكوان
إمي نديمه قلت.. وبجاهر 
إنك عظيمه.. وبالكرم بستان
خسرت أمي.. اليوم مش قادر 
إخسر حنانك.. عيش بالأحزان 
يرحم ترابك معدنك نادر 
متلك مرا ما بتخلق النسوان
لتاج الأمومه بتركع جواهر 
وبتضل رغم الموت بالوجدان
مسّح دموعك يا إبن نادر 
بنت القداسه طالبا الديّان
بعزّي عيالك.. بجبر الخاطر 
بعرف أنا إنو القلب زعلان
بعزّي قبر بـ ضيعتي ناطر 
قبر الحبيب الغايب بلبنان
مخاييل زوجك.. ما بقى صابر 
قلّك تعي.. يا ام طوني لهون
نكفّي العمر بـ جنّة الرضوان
**

سبعون اخي جوزاف

ـ1ـ
رح خبركن خبريّه
عن فرحة أمي وبيي
بـ سنة التسعه وأربعين
قدّملن ألله هديه
ـ2ـ
طفل زغيّر شو قمّور
متل الزهره بجنينه
من وجّو بيشع النور
وإسمو جوزاف البعيني
ـ3ـ
كبر وصفّى رفيق وخيّ
ما بعمرو بيزعّلني
لما بشوفو بصرخ: خي
فوق الغيم بيحملني
ـ4ـ
جوزاف خيي اللي بحبّو
أكبر منّي بشي سنتين
لمّن سكّني بقلبو
سكّنتو جوّات العين
ـ5ـ
ولما احتفلوا بالخمسين
يوبيلي الما بيتكرر
وقف حدّي.. متلو مين
بيخلّي خيّو يكبر
ـ6ـ
يا خيي بقلك وبعيد
إنت الفرحه بغربتنا
انشالله بتتهنا بهالعيد
عيدك هوّي فرحتنا
ـ7ـ
عندك عيله ملوى الكون
ربّيتا بتقوى ألله
متلا ما بيتلاقى هون
بتسوى هالدنيي كلاّ
ـ8ـ
يا فرونيكا بدي قول
بعيد الخي وأحلى رفيق
رفيقة عمرو مش معقول
كيف توفّق هالتوفيق
ـ9ـ
يا خيي زتّ السبعين
وخلّي عينك ع الميّه
انشالله بالميه وعشرين
بشوفك حدي يا خيي
**

رحماك ربّي

رحماك ربّي إنني
قدّام عرشك أنحني

مترسملاً في غربةٍ
بالحب.. والعيش الهني

لا لست أبغي ثروةً
حلمي بعطفك أغتني

عمري بدونك كذبةٌ
مدّ اليدين وضمّني
**

عيلة نادر

ألقيتها بسهرة عيد الميلاد المجيد في منزل الصديق العزيز جوزاف وجيه نادر 24/12/2018

جايي أنا.. والشعر ماشي دبدبه
تا عيّد بهالعيد أغلى حبايبي
جوزاف نادر كل عمرو بمكتبي
بيزورني.. يا سنين لا تتعجبي
هلق انا جايي تا حقق مطلبي
وبليلة الميلاد قوم بواجبي
جايي تا قلّو بالشعر حبك رِبي
بغربة صداقه مقدسه بمذهبي
دقت الشقا ومرقت سنين مكهربه
وخسرت ناس كتير راحوا كركبه
بحلف بأللـه وكم شعره شايبه
حدّي وقفت ما تركتني يا صاحبي
هالبيت بيتي.. يا حروفي حوربي
من يوم بو ميلاد.. هالبي الأبي
بحبّن أنا.. فيكي القصيده تكتبي
ع قلوب بيضا.. طاهره ومهذبه
ويا شمس نور الحب أوعا تحجبي
نجوم الطرب كرمالنا متأهبه
والفن هون الفن.. غنّي واطربي  
وع الطبل دقي.. وع الكمنجه إلعبي
الأصوات حلوه.. والنوايا طيّبه   
قومي ارقصي وتغنجي وتشبشبي
وحياة ألله.. وكل ما ذكرتو نبي
عيلة بني "نادر" عظيمه مأدبه
بالمرتبه.. وصلت لأعلى مرتبه
ولهالسبب رح قول جمله مدهبه:
هيي الصبي وأم الصبي وبي الصبي
**

لو عندك ثقه فيي

قصيدة لم تنشر بعد كتبتها بعمر 15 سنة، ووجدتها في المخطوطة التي حملها الي من لبنان الأب عبود جبرايل

ـ1ـ
لو عندِكْ ثقه فيي
كنتي بتهديني هديّه
من دون ما تخافي إمِّك
أو تستحيي من بيي
ـ2ـ
وكنتي بتزوري بيتي
ليليه عند السهر
بتقولي شو استحليتي
بجبلك.. لو كان القمر
ـ3ـ
بعمرلك دنيي جديده
من دون ما إشقع حجر
دنيي.. ببنيها يإيدي
مش ساكن فيها بشر
ـ4ـ
ومنصير نلعب ونغني
ونتفيّا تحت الشجر
إنتي وأنا بالجنه
ما منعود نعرف ضجر
**

ليلة عرسي

من القصائد التي كتبتها بعمر 15 سنة ولم تنشر بعد، وجدتها ضمن المخطوطة التي حملها لي من لبنان الأب عبود جبرايل، فألف شكر له:

ـ1ـ
بدّي من شفافك بوسه
تكون كبيره
تفقع.. تا بليلة عرسي
تفيق الجيره
ـ2ـ
وبدّي أنّات وبدّي
تدليع شويْ
وبدّي شعّل المخده
وطفّيها بمي
ناديكي وإنتي حدي
ما تردي عليْ
وتوعى ستي مع جدّي
وأهالي الحيْ
واحد يركض تا يهدي
ووحده يا خطيْ
بلحظه حكمتها الجمده
وبعدا زغيره
**

أسمهان

ألقيتها في سهرة تخليدية للسيدة أسمهان "آمال فهد فرحان اسماعيل الأطرش" أقيمت في صالون الدكتورة بهية ابو حمد، كانون الأول 2018

يا "أسمهانُ".. الصّوتُ قد أحياكِ      
أنتِ الأميرةُ والشّذا دنياكِ

"آمالُ فهدٍ" من جبال العُرْبِ هلْ     
بالإسم قلبُ الشرقِ قد ناداكِ

فالإسمُ فخرٌ للدنى يا نجمةً       
شعّتْ هنا.. شكراً لمنْ أسماكِ

فقتِ الخلائقَ نغمةً سحريّةً      
كانتْ كشدو الطير في الأفلاكِ

ما "الأطرشُ" المحبوبُ إلاّ كُنيةٌ     
لمعتْ.. كلمعِ الضوءِ في الأسلاكِ

هذا "فريدٌ أطرشيٌّ" فخرُه    
من روعة الألحان قد سوّاكِ

فيينا.. وهل للأنسِ فيها ليلةٌ     
لو لم تمنِّ العمرَ في لقياكِ

حتّى الطيورُ تهامستْ في جنّةٍ     
قالت لربّ الكونِ ما أحلاكِ

كلُّ القلوبِ تبدّلتْ أهواؤها      
لمّا أمرتِ القلبَ أن يهواكِ

ها مصرُ قد أعطتْكِ مهداً دافئاً

والنيلُ بالأمجادِ قد غطّاكِ

لا لم تموتي في حنايا تُرعةٍ

فالماءُ بالأحضانِ قد لاقاكِ

عندَ "البهيّةِ" قد جمعنا شملَنا     
أفراحُنا.. لا لمْ تكن لولاكِ

لم ننسَ نوتاتِ الأغاني.. خوفُنا   
في زحمةِ الأعمال أن ننساكِ

والصوتُ يشدو رغم بعدِ مسافة    
إنّا بسيدني قد رفعنا لواكِ

كم من شعوبٍ قد زوت في لحدها    
تفنى.. ويبقى خالداً ذكراكِ

**

عيد ميلاد 2018

ألقيت في حفل أقامه مجلس الجالية اللبنانية

ـ1ـ
لما الميلاد يطل عم نفرح
وننسى مصايب عمرنا بتجرح
إنتو الأهل.. إنتو فرح هالعيد
بغربه طويله قلوبنا بتدبح
حبّيتكنُ.. والحب منّو جديد
وصعبه إذا حبّيت إتزحزح
من هون رح هنّي الوطن البعيد 
بركي السلام بيسرح ويمرح
وحدا المحبه بهالزمن بتفيد
بتضوي العتم ودروبنا بتفتح
يا مجلس بهالجاليه رح عيد
شعر اللي قلتو وزيّن المسرح
بالإغتراب محبتك بتزيد
بتجمع بشر.. بتوزّع مواعيد
وتارك بقلبك للوطن مطرح
ـ2ـ
بسأل يسوع الطفل بالمزود
ليش البشر عن بعضها بتبعد
وليش الحرب بتصير بين شعوب
بترجع بعد سنتين تتوحد
بعد البكي.. منحمل صبر أيوب
تا نعيش حد القاتل ونسعد
ماشي الوطن لبنان بالمقلوب
الأزمات خلّت جوّنا ملبّد
بدنا وطن بين الدول مهيوب
بالشعر.. بالألحان يتمجّد
ما في حدا محّى كذب وعيوب
ما في حدا درب الوطن عبّد
أزلام كلّن تا يعبّوا جيوب
حسّ الرجوله عندُن مجمّد
ونحنا الـ هجرنا والقلب بيدوب
صادر حكم بطردنا.. مأبّد
يا يسوع الطفل شنّوا حروب
تا يرفعوا دولارن الأوحد
بيشرّدوا ملايين فوق دروب
كرمال حاكم أجرم وعربد
يهود عصرك علّقوا المصلوب
هيدا إنت يا سيدي الأمجد
واليوم صلبوا شعبنا المحبوب
وسكتت دني.. تاريخها أسود
ـ3ـ
الليله أنا رح عيّد الميلاد
مع ناس هنّي العيد بالغربه
سبقنا الدني.. لبسنا تياب جداد
وخبّيت هالأحباب بـ قلبي
ع غيبتُن بكيت سما البلاد
وبرجعتُن عم تفرح التربه
صعبه تا ينسوا موطن الأجداد
وتا يغدروا بـ هالبلد.. صعبه

**

عيد استقلال لبنان 2018

ألقيت باحتفال مجلس الجالية اللبنانية في مدينة بانكستاون ـ سيدني

ما أجملك بالعيد يا تشرين     
حفرنا الإسم بقلوب مغتربين
يا دلّ شعبي بدون إستقلال     
لا تفرّطوا بالمجد يا محبين
لبنان.. هالسهل وشموخ جبال     
ضحى بشبابو سنين خلف سنين
بلاد الأرز ما بتنشرى بالمال     
 رجال البطوله ركّعوا التنين
بجنوبنا عم يخلقوا الأبطال      
وبشمالنا الأرزات سهرانين
ولولا بأيا أرض مرّ خيال     
إنسان لبناني.. الصخر بيلين
بيشلح ع كتف الكون أجمل شال   
علم وحضاره.. وما بيحني جبين
عندو المحبه والوفا رسمال      
وعندو الكَرَم أزهار وبساتين
أجيال ربّت ع التقى أجيال     
وقفت بـ وجّ الـ سيّسوا هالدين
لكن، بعيدك سيّئه الأحوال     
رغم الفرح بالخامس وسبعين
بعدا الزعامه بتسرق بتحتال      
وبعدو الشعب مسكين.. شو مسكين

منجمع دول تا نشحد الأموال

وْلِكْ.. عيب نحنا نصير شحّادين
ما في حكومه تنفّذ الأشغال     
بلا كهربا.. وبالعتم غرقانين
والميّ.. ما في ميّ.. والشلال     
نازل هدر ع البحر.. ألله يعين
وطرقاتنا فيها الجور أشكال       
حتّى الزفت ضد الشعب.. تخمين
نقطة حليب بيشحدوا الأطفال       
وغالي الدوا.. والناس طفرانين
يا "مجلس" اللي الشعر فيك انقال   
ما رضيت مرّه تربّح السكين
زرعت الأمل.. عشنا براحة بال    
إخوان فينا بتنضرب أمثال
وقلوب متل التلج ع صنين
**