ليش جايي قول يا تشرين
من دون خبز.. من دون دوا وبنزين؟
ولبنان زادوا فوق همّو حْمال
سياسات ناقصها العقل والدين
لا الشعب قادر يطعم الأطفال
حتّى المدارس صارت دْكاكين
الدولار عم يسرق خبز العيال
نهبوا ليرات الناس.. سرّاقين
والنار عم تحصد ضيع وتلال
أجمل وطن عم تحرقوا شياطين
من الإغتراب منرسل الأموال
بلمح البصر بتطير الملايين
حتّى الزباله كوّما الزبّال
بين البيوت الْـ ساكنا محبّين
ما في حدا عم يفضح المحتال
نصّ اللي حكموا الشعب محتالين
عم يوعدونا بس بالأقوال
وأفعالهن بطّيخ ع السكين
ع طول عم منضيّع الآمال
وعم ننتخب نفس السياسيين
لبنان بدّو رجال.. أقوى رجال
ونسوان قلبُن من صخر صنّين
بدّنا الأرزه تنتفض بجبال
وتحضُن بـ فيّاتا المغتربين
ساعتا مجد الدني بينطال
وبيصير فينا نعيّد استقلال
ونفرح إذا بتطل يا تشرين
