الى الطفل بيار مرسال بعيني بعيد ميلاده الأول ـ 18 آب 2019
ـ1ـ
يا بيار كفّيت السنه
وفرحت بملقاك الدني
صفّيت شبّ منعرفك
طلّقت عهد الولدني
إبن الشرف.. ما أشرفك
عايش قنوع ومغتني
من فوق جدّك شايِفك
تا يبوس خدّك منحني
بنور القداسه ملفلفك
وجّو بـ لون السوسنه
والجد طوني مهفهفك
متل التلج.. عمرو هَني
بيبوّسَك.. بينتّفَك
بـ طلتك قلبو غني
ـ2ـ
وإمك وبيّك يا صبي
عطيوك أعلى مرتبه
إمّك ع صدرا بتحملك
رغم السنين المتعبه
وبيّك إذا بيدللك
بيقلّدك بالدبدبه
وستّين عملوك الملَك
بعيله عظيمه مرتّبه
ما أروعك.. ما أجملك
شمس العمر كلاّ إلك
وأحلى سنين مدّهبه
**
