إلى روح جاري وصديقي المرحوم يوسف أبي خطّار
جار كنت وهون بعدك جار
أصلك دهب مهما دولابك دار
سيدني ومجدليا إنتْ حبّيت
عطيتُن قلب بالتضحيّه جبّار
بعرف أنا شو عملت.. شو ضحّيت
تقعد معي وتفلفش الأسرار
حبّيتني.. وكل البشر حبّيت
خلفك أهل.. لا تخاف شو ما صار
ألبير.. هالشب الـ إنت ربّيت
خايف عليك كتير.. دمّو نار
لمّا اتصل فيّي.. أنا جنّيت
عمي مريض كتير.. عقلو طار
بعصر الكورونا والقهر حسّيت
رح إنفجر.. محبوس جوّا الدّار
وحدو البونا عبّود ع السكيت
يوديلنا، عن صحتك، أخبار
لأمنا العدر ركعت صليّت
والدمع ع الخدين عبّى جرار
بموتك يا يوسف ع البعد عزّيت
ألبير لازم بوّسو قنطار
يرحم ترابك ع الدني طليت
متل الشمس.. هيك بيجوا الكبار
متلك أنا بهالكاينه ما لقيت
بيكفي الإسم: يوسف أبي خطّار
