الى روح خالتي عاقلة زخور
آخر حبّات العنقود
يا بنت جرس عبّود
يا "خاله" حبيتا كتير
الدنيي متلا صعب تجود
يا "عاقله" لو فيي طير
من سيدني.. وع بلادي عود
تا بوس جبينك الكبير
وإزرع دمعاتي ع خدود
سهروا عليي طفل زغير
وعطيوني الحب بلا حدود
ببكيكي بعصر التعتير
بعصر "الكورونا" المرصود
مش رح صدّق هيك يصير
مفقود بيبكي مفقود
اشتقتي لبو جوزاف زخّور
دخل عيونو أبو الميش
رحتي لعندو.. شع النور
من دونك ما فيه يعيش
موتك رح يحيي القبور
ملاك بلا جوانح أو ريش
حالف إني بيتك زور
صفّى بيتك قبر مزار
رح بيزورو هالختيار
ويوقف ع بابو درويش
**
